काठमाडौं साउन २०– भारतीय जनता पार्टी (भाजपा)का नेता विजय जोलीले नेकपा एमाले अध्यक्ष केपी शर्मा ओलीलाई नेपालको भावी प्रधानमन्त्रीको शुभकामना दिएपछि भाजपामा विवाद उत्पन्न भएको छ । उनले नेपालबाट भारत फर्केलगत्तै फेसबुकमार्फत नेकपा एमालेका अध्यक्ष केपी शर्मा ओलीलाई भावी प्रधानमन्त्रीको शुभकामना दिएका थिए । तर, पार्टीमा त्यसको टीका–टिप्पणी सुरु भएपछि जोलीले सो पोस्ट फेसबुकबाट हटाइसकेका छन् ।
साउन १० गते एमाले भ्रातृ संगठन युथ फोर्सले आयोजना गरेको कार्यक्रममा सहभागी हुन नेपाल आएका नेता जोलीले एमाले अध्यक्षलाई भेटेका थिए । भेटमा उनले नेपालको आगामी प्रधानमन्त्री ओली नै पक्का भएको र दिल्ली फर्केर सबै चाँजोपाँजो मिलाउने बताएका थिए । उनले आफ्नो फेसबुकबाट भावी प्रधानमन्त्रीका रूपमा ओलीलाई बधाई पनि दिएका थिए । त्यसो त उनले कार्यक्रममा पनि ओलीलाई नेपालको भावी प्रधानमन्त्रीका रूपमा सम्बोधन गरेका थिए ।
नेता जोलीलाई भाजपामा प्रभावशाली नेता भनिए पनि पार्टीले अहिले उनलाई कुनै पद दिएको छैन । विदेश विभाग प्रमुखको नामबाट पटक–पटक नेपाल आएर यहाँका नेतालाई भेटी ‘खातेदारी’ लिने गरेका जोली यसपटक भने विवादमा तानिए ।
उनलाई नेपालमा भाजपाका विदेश विभाग प्रमुख भने पनि उनले त्यसलाई खण्डन गरेनन् । उनले जहाँ पनि परिचय दिँदा आफूलाई भाजपाको विदेश विभाग प्रमुख नै भएको बताउँथे । जब कि अहिले भाजपाका विदेश विभाग प्रमख विजय चौथाइवाले छन् ।
0 comments:
Post a Comment