कैलाली, भदौ १४ । २६ दिनदेखिको लगातार बन्दको कारण कैलालीको टीकापुर बेहाल बनेको छ ।
२६ दिनअघि अखण्ड सुदूरपश्चिम पक्षधरले बन्द आह्वान गरेका थिए भने त्यसको दुईदिनपछि थरुहट पक्षधरले बन्द गरे यता टीकापुर खुलेको छैन ।
७ गते आन्दोलनकारीको झडपमा प्रहरीका एसएसपी सहित ८ सुरक्षाकर्मी र एक बालकको मृत्यु भएपछि कर्फ्यु र दंगाग्रस्त घोषणा गरिएको टीकापुर त्यसयता पूर्ण रुपमा बन्द छ ।
लगातरको बन्दका कारण जनजीवन निकै कष्टकर भएको छ । नून तेल, चामल जस्ता दैनिक उपभोग्य बस्तुको अभाव भएको छ ।
बजारमा रिचार्ज कार्ड सम्म सकिएकोले स्थानीयलाई सञ्चार सम्पर्कमा समेत कठिनाई भएको छ । कतिपय वस्तुको मूल्य आकासिएको छ । तरकारीको अभाव भएको छ । कतिपय सामानको कालोबजारी भइरहेको छ ।
सय रुपैयांको रिचार्ज कार्ड दोब्बर मुल्यमा बिक्री भएको पाईएको छ । टीकापुर उद्योग वाणिज्य संघले बन्दले उद्योग व्यवसाय धराशायी भएको, दैनिक उपभोग्य बस्तुको चरम अभाव भएको र जनजीवन अत्यन्त कष्टकर भएको बताएका छन् । कफ्र्यु खुकुलो गर्न प्रहरी प्रशासनलाई स्थानियले आग्रह गर्दै आएका छन् ।
उता, सुरक्षा संवेदनशीलतालाई मध्यनजर गर्दै टीकापुरमा गत सोमबारबाट लगातार लगाइएको कर्फ्यु आजबाट केही खुकुलो पारिएको छ ।
चौबिसै घण्टा लगाउंदै आएको कर्फ्यु आजबाट बिहान ८ बजेदेखि १० बजेसम्म दुई घण्टाको लागि खोलिएको हो । कर्फ्यु खुकुलो पारिएसंगै स्थानियको दैनिकी केही सहज बनेको छ ।
उता, कर्फ्युको कारण टीकापुरमा फसेकाहरुलाई प्रहरीले उद्धार गरी धनगढी पुर्याएको छ ।
स्थानीय प्रशासनले कैलालीकै भजनी त्रिशक्तिनगरपालिका सहित दुर्गौली, धनसिंहपुर, पथरैया, मुनुवा, जोशीपुर, नारायणपुर, बौनिया र थापापुर गाविसमा लगाइएको कर्फ्यु भने अझै हटाइएको छैन ।
प्रशासनले धनगढी नगरपालिकामा भने सोमबार पनि साढे ११ बजेदेखि साँझ साढे ५ बजेसम्मका लागि फेरी कर्फ्यु आदेश जारी गरेको छ । दंगाग्रस्त क्षेत्र घोषणा गरिएका सबै गाविसमा सेनाको उपस्थिति छ ।
0 comments:
Post a Comment