बजार बीचको सडक मै रोपाइँ

ताप्लेजुङ, साउन २२ – अगाडि बाउसे, पछि रोपारहरु धान रोपिरहेका थिए । हिलो सम्याउन सजिलो तरिका अपनाइएको थियो । जिपको पछाडी तीन टायर झुण्ड्याइएको थियो । बिस्तारै जिप अगाडि गुडेर जान्थ्यो पछाडी झुण्ड्याइएका टायरमा चडेर एक जनाले हिलो सम्याँउदै थिए । दायाँ बायाँ ठुल्ठुला घर बीचमा भएको हिलाम्मे ठाउँ रोपाइँ गर्न उपयुक्त थियो । रोपाइँ गर्ने मानिस धेरै थिए ।  भीडमा कोही भन्दै थिए यो ठिक गरे सबै मिलेर यहाँ रोपाइँ गर्नै पर्दैनथ्यो । निकै मेहनताका साथ गरिएको यो रोपाइँ खेतमा भने गरिएको थिएन । ताप्लेजुङका बासिन्दाले हिलाम्मे सडक छिटो बनाउन दबाब दिनका लागि गरेको व्यंग्यात्मक रोपाइँ थियो यो । ताप्लेजुङ सदरमुकामको मुख्य बजार भित्र पर्ने झण्डै एक कलोमिटर सडक पानी परेपछि हिलाम्मे हुने र घाम लागेपछि धुलोले बजारलाई नै ढाक्ने भएपछि स्थानीय बासिन्दाले बिग्रेको सडक बनाउन दबाब दिने उद्देश्यले शुक्रबार बाटोमा नै रोपाइँ गरेका हुन् । बीच बजारको झण्डै एक किलोमिटर सडक बिग्रिएको धेरै भएपनि मर्मतको काम नहुँदा दबाब दिन स्थानीय बासिन्दाले पानीले हिलाम्मे बने सडकमा रोपाइँ गरेका हुन् ।

 पटक पटक सम्बन्धित निकायमा ध्यानाकर्षण गराएपनि अहिलेसम्म सडक स्तरोन्ती नभएकाले आन्दोलनमा उत्रनु परेको स्थानीय बासिन्दाले बताएका छन् । कालोपत्रे भएको दुई वर्ष नुहुँदै सडक बिग्रिएपछि स्थानीय बासिन्दा आक्रोशित भएका छन् । दुई वर्ष अघि अहिलेका नुवाकोटबाट निर्वाचित सभासद तथा हिमडुङ थोकरका ठेकेदार बहादुर सिंह लामाले ताप्लेजुङ सदरमुकाम लगायत सुकेटारसम्मको सडक कालोपत्रेको ठेक्का लिएका थिए । सभादस समेत रहेका लामाले ठेक्का लिएर गरेको कालोपत्रे जति सबै भत्किएको स्थानीय बासिन्दाले आरोप लगाएका छन् । सदरमुकाम भित्रका मुख्य सडक नै जिर्ण तथा हिलाम्मे भएपछि यसको पुनर्निमार्ण तथा मर्मत नहुन्जेलसम्मका लागि जिल्ला बासिन्दाले बिमल भण्डारीको संयोजकत्वमा बिरोध समिति नै बनाएका छन्

यो समाचारसंग सम्बन्धित भिडियो तल छ, हेर्नका लागि विचमा थिच्नुहोस्

Posted in: News