सुर्खेतमा कर्फ्यू, दोस्रो दिन पनि तनाव (प्रहरी फायरिङमा कयौं घाइते)

सुर्खेत, श्रावण २६ - अखण्ड मध्यपश्चिम र प्रान्तीय राजधानी सुर्खेत हुनुपर्ने माग गर्दै थालिएको आन्दोलनको दोस्रो दिनपनि प्रहरीले आन्दोलनकारी माथि फायरिङ गर्दा १२ जना आन्दोलनकारी घाइते भएका छन् । स्थानीय प्रशासनले स्थिति नियन्त्रणमा लिन साँझ साढे ६ बजेदेखि आज राति ९ बजेसम्म कर्फ्यू लगाएको छ ।  मंगलगढी चोकमा आज दिउँसो प्रहरीले आन्दोलनकारी माथि फायरिङ गरेको हो । प्रहरीको गोली लागि घाइते भएका लाटीकोइलीका वलबहादुर महतरालाई उपचारका लागि क्षेत्रीय अस्पताल पुर्‍याइएको छ । घाइते भएका मध्ये ११ जनालाई उपचारका लागि स्थानीय देउती अस्पतालमा पुर्‍याइएको छ । घाइते ल्याउने क्रम जारी रहेको हुनाले संख्या बढ्न सक्ने उपचारमा संलग्न एक स्वास्थ्यकर्मीले बताएका छन् ।

प्रहरीको फायरिङबाट घाइते हुनेहरुमा डम्बर विक, भीम विसी, कृष्ण रावल, दिपेन्द्र न्यौपाने, रामकृष्ण रावल, योगेस पुरी, रमेश गिरी, नवराज बराल र धर्मराज गन्धर्ब रहेका छन् । उनीहरुको स्थानीय देउती अतालमा उपचार भइरहेको छ । मंगलगढी चोकमा भेला भएका आन्दोलनकारी तिरबाट प्रहरी तर्फ ढुङ्गा प्रहार गरे लगतै प्रहरीले टेयर ग्यास तथा हवाई फायर गरेको प्रहरीले जनाएको छ । प्रहरीले अहिलेसम्म ६ जना आन्दोलनकारीलाई पक्राउ गरेको जनाएको छ । प्रमुख जिल्ला अधिकारी बलदेव गौतमले आन्दोलन उग्र बनेपछि नियन्त्रण लिन हवाइ फाइरिङ गरिएको जानकारी दिए । उनले आन्दोलनकारीलाई नियन्त्रणमा लिने प्रयास भइरहेको बताएका छन् । प्रहरी प्रमुख एसपी राजेशकुमार लाल कर्णले आन्दोलनकारीले चारै तिरबाट आक्रमण प्रयास गरेपछि स्थितिलाई नियन्त्रणमा लिन हवाइ फायर गरेको बताए । उनले तनाव नियन्त्रण गर्ने प्रयासमा प्रहरी रहेको बताए । मगंलगढीमा अहिले पनि प्रर्दशनकारी र प्रहरी बीच पटक पटक झडप भएको छ । भने हवाइ फायर पनि जारी रहेको छ । प्रहरीले अहिलेसम्म दुई दर्जन भन्दा बढी राउण्ड गोली चलाएको आवाज सुनिएको छ । यसअघि सोमबार प्रहरी फायरिङमा २ जना आन्दोलनकारीको मृत्यु भएको थियो ।

यो समाचारसंग सम्बन्धित भिडियो तल छ, हेर्नका लागि विचमा थिच्नुहोस्

Posted in: News