मानन्धर हत्या प्रकरण, रिगल पनि जेल चलान

बाँके प्रहरीको सर्वाधिक खोजीमा रहेका चेतन मानन्धर हत्याका मुख्य अभियुक्त रिगल भन्ने योग प्रसाद ढकाल सोमवार आफै बाँके जिल्ला अदालतमा हाजिर भए । गत अषाढ २० गतेबाट योजना बनाइ अषाढ २८ गते मानन्धर हत्यालाई अन्जाम दिइएको प्रहरीले खुलासा गरेको थियो । त्यसमा समूह युद्ध हुन सक्ने आशंकामा रिगलले बाहिरबाट पनि युवाहरुलाई बोलाएको र उनीहरुलाई आफ्नै लगानीमा होटलमा बसाली योजनाबद्ध तरिकाले मानन्धरको हत्या गरिएको बाँके प्रहरीले दाबी गरिरहेका बेला रिगल बाँके जिल्ला अदालतमा आफै उपस्थित भएका थिए । कर्तब्य ज्यान मुद्दामा फरार रहेका रिगललाई सोमवार नै अदालतले पुर्पक्षका लागि थुनामा राख्ने आदेश दिएको हो । अदालतको आदेश पछि रिगललाई बाँके कारागार पठाइएको श्रेस्तेदार उपसचिव डण्डपाणि लामिछानेले बताए । जम्मा १५ जना प्रतिवादी बनाइएको मुद्दामा ११ जना यसअघिनै कारागार चलान भइसकेका छन् श्रेस्तेदार लामीछानेले भने, नेपाल सरकार वादी र रिगल भन्ने योग प्रसाद ढकाल प्रतिवादी रहेको कर्तब्य ज्यान मुद्दामा प्रतिवादीका तर्फबाट अधिवक्ता लोक बहादुर शाह र लोक नारायण बिसीले बहस गरेका थिए । नेपाल सरकारका तर्फबा न्यायाधिवक्ता सुशील देवकोटाले बहस गरेको मुद्दामा बाँके जिल्ला अदालतका न्यायाधीश विष्णु प्रसाद कोइरालाको इजलाशले रिगललाई मुद्दा पुर्पक्षका लागि थुनामा राख्ने आदेश दिएको हो । आदेश लगत्तै रिगललाई जेल पठाइएको हो मीडिया संग कुराकानीका क्रममा श्रेस्तेदार लामिछानेले भने, अझै ३ जना फरार छन् । घटनाको दिन अषाढ २८ गते विहान रिगल ढकालले हरी वलीले प्रयोग गरेको मोबाइल ९८५८०२७१४३ मा फोन गरी निजलाई आफ्नो घरमा बोलाएको र हरि वलीले यम बहादुर बुढामगर, विवाद पाठक र मनिस चौलागाईलाई फोन गरी कारकाँदो चोकमा भेटी योजना तय गरि रिगल आफैले चेतन मानन्धरलाई खुडा प्रहार गरी हत्या गरेको पाइएको एसपी वसन्त पन्तले जानकारी दिएका थिए ।

प्रहरीले बाँके जिल्लामा दायर गरेको अभियोग पत्रमा पनि रिगललाई मुख्य अभियुक्त देखाइएको छ । प्रहरीले हालै कुख्यात गुण्डा कुमार घैंटेलाई इन्काउन्टर गरेपछि अचेल फरार गुण्डाहरु आफै प्रहरी नियन्त्रणमा आउन थालेका छन् । हत्या अघि रिगलले आफ्नो समूहका फरक फरक क्षेत्रबाट आएका युवाहरु संग छलफल गरी मानन्धर हत्या बारे योजना बनाएका थिए । मानन्धर पनि रिगल समूहकै भएको तर केही आपसी विवाद पछि समूह छुट्टिएको प्रहरी भनाइ छ । १४ जना रिगलका गुण्डाहरु एकैठाउँमा पुगेर सिद्धार्थ कटेज नजिक मानन्धरलाई बोलाएर रिगलले खुडा प्रहार गरी हत्या गरेको देखिएको प्रहरी अभियोग पत्रमा उल्लेख छ । रिगलले आफ्नै मोबाइल प्रयोग गरी चेतन मानन्धरलाई फोनगरी आउनुस बसेर विवाद समाधान गरौं भनी वार्ताका लागि बोलाएको र कुराकानीका क्रममा रिगलले आफै अचानक खुडा प्रहार गरेको विषयमा अभियुक्तहरुले दिएको बयान समेत प्रहरीले अदालतमा पेश गरेको छ । घटनाको जानकारी प्राप्त भएपछि प्रहरी प्रमुखकै कमाण्डमा टोली तत्काल जिल्लाबाट बाहिर जान सक्ने नाकाहरुमा चेकजाँच सुरु गरिएको र घटनास्थलबाट भाग्दै गरेका अभियुक्तहरुलाई लखेटेर पक्राउ गरिएको, प्रत्यक्षदर्शीहरुको बयान र भनाई सहितको सबूद प्रमाण मुद्दा संलग्न राखिएको पाइएको छ । वारदात स्थलबाट हत्यामा संलग्न रिगलले प्रयोग गरेको एउटा खुँडा र अन्य अभियुक्तले प्रयोग गरेको ३ थान खुँडा दशी प्रमाणमा राखिएको अदालतले जनाएको छ । यसअघि प्रशान्त गौतम, नवराज खत्री, विशाल बस्नेत, मोहन खड्का, केशव रोकाय, प्रितम थापा, माधव परीयार, हरी वली, विवाद पाठक, यमबहादुर बुढामगर र मनिश चौलागाईलाई अदालतले मुद्दा पुर्पक्षका लागि थुनामा राखेको छ । नेपालगन्ज वडा नं.२४ बस्ने प्रकाश सिंह ढकालको छोरा २२ वर्षिय सोहनसिंह ढकाल र २३ वर्षिय दिपेन्द्र सिंह फरार रहेको प्रहरीले जनाएको छ । अदालतले दिपक केसी भन्ने एकजना थप मुद्दामा जोडिएको जनाएको छ । यसअघि प्रहरीले कहिंकतै नाम नलिएका दिपक केसी मुद्दामा कसरी जोडिए भन्ने बारे अदालतले पनि विस्तृत बताउन चाहेन । नेपालगन्ज वडा नं.१६ स्थित ज्योति सिम्ताली होटलमा रहेको गाडीको काउन्टरको सम्पर्क कार्यालयमा छलफल गर्ने बहानामा नेपालगन्ज ८ बस्ने मृतक चेतन मानन्धर लगायतका ब्यक्तिहरुलाई बोलाई रिगल भन्ने योग ढकाल समेतका ब्यक्तिहरुले अषाढ २८ गते दिउँसो ३ बजेको समयमा मानन्धरलाई धारिलो हतियार (खुडा) प्रहार गरी हत्या गरेको प्रहरी प्रतिवेदनले देखाएको छ ।

यो समाचारसंग सम्बन्धित भिडियो तल छ, हेर्नका लागि विचमा थिच्नुहोस्

Posted in: News