१३ बर्षीय बालक किच्ने ट्याकटर चालक ३१ बर्षपछि पक्राउ

१३ बर्षीय बालकलाई ट्रयाकटरले किचेको अभियोगमा प्रहरीले भिम प्रसाद गोजालाई ३१ बर्षपछि बिहीबार पक्राउ गरेको छ। गोजाले चलाएको ट्याकटरले २०४१ साल जेठ ३१ गते तत्कालीन भक्तपुर नगरपञ्चायत-३मा पर्ने गरुड कुण्डलमा तेज कुमार कोजुको १३ बर्षिय छोरा कृष्ण गोपाल कोजुलाई किच्याएको थियो। गोपाल कोजुको घटनास्थलमा नै मृत्यु भएको थियो । अभियुक्त गोजालाई फैसलाका लागि भक्तपुर जिल्ला अदालतमा बिहीबार नै पेश गरिएको केन्द्रीय अनुसन्धान ब्यूरो, महाराजगंजले जनाएको छ । जिल्ला अदालत, भक्तपुरले २०४२ साउन १० मा उनीविरुद्ध २ बर्ष कैद सहित एक हजार जरिवाना, दुई हजार काजकिरिया खर्च भराउने फैसला गरेको थियो । यसको दुई बर्षपछि २०४४ साउन १७ गते मध्यक्षेत्रिय अदालतले बदर गरी पुन: निसाफका लागि सम्बन्धित अदालतमै फर्काएको थियो । वि.सं. २०६०फागुन ११मा जिल्ला अदालत भक्तपुरले आफ्नो पुरानो फैसललाई नै सदर गरेको थियो। घटनाको ३१ बर्ष र अदालतको पछिल्लो आदेशको ११ बर्ष भन्दा बढि समयपछि उनलाई प्रहरीले पक्राउ गरी अदालतमा पेश गरेको हो।

यो समाचारसंग सम्बन्धित भिडियो तल छ, हेर्नका लागि विचमा थिच्नुहोस्

Posted in: News