अरु प्रहसनमा पनि देशको वर्तमान अवस्थाप्रति चिन्ता प्रकट गर्दै राष्ट्रिय एकता र सामाजिक सद्भाव बढाउन आग्रह गरिएको छ । जिरे खुर्सानी समूहले भूकम्पपछि पालभित्रको बसाईलाई रमाइलो र व्यंग्यात्मक पारामा देखाउन खोजिएको छ । पालभित्र बस्न आएकाहरु सबै आआफ्नो भाग मात्रै खोज्ने तर भत्कन लागेको पाल बनाउन नखोज्ने प्रवृत्तिलाई सिंगो देशको अवस्था र सीमांकनमा भैरहेको विवादसँग तुलना गरिएको छ । अनि सिंगो नेपाल जोगाउन सके मात्रै सबैको भलो हुन्छ भनेर कलाकारहरुले प्रहसनमार्फत सन्देश दिएका छन् । मेरी बास्सै समूहको प्रहसनमा पनि यसैगरी राष्ट्रियताको भाव दर्साउन खोजिएको छ । अर्का हाँस्यव्यंग्य कलाकार मनोज गजुरेल यसवर्ष मन्त्री लालबाबु पण्डितको भूमिकामा देखिनुभएको छ । मन्त्री पण्डितको अभियानपछि डिभी, पिआर लिने कर्मचारीभित्र देखिएको हल्लीखल्लीसँगै उहाँले आन्दोलन जबर्जजस्ती उकास्न खोज्नेहरुलाई पनि व्यंग्य गर्नुभएको छ । गजुरेलले आफ्नो प्रहसनमा भन्नुहुन्छ, ‘तपाईंलाई कसैले पचास लाखको आश्वासन दिएर शहीद बन्न हौस्याउनेलाई भनि दिनुहोला( भैया, आज नगद , कल उधार , याद राख्नोस्, तपाईंको अमूल्य जीवन कसैको मुख्यमन्त्री बन्ने सनकको सिकार नबनोस् ।’ अर्का कलाकार राजा राजेन्द्र पोखरेलले जोशिलो उद्घोषणसँगै गीत, कवितामार्फत दर्शकलाई हँसाउनुहुन्छ ।
प्रज्ञा भवनमा मात्र भएको यसवर्षको गाईजात्रा भूकम्पको प्रभाव र त्यसपछिको अवस्था, संघीयता र सीमांकनको विवाद र राजनीतिक अस्थिरतामा केन्द्रित छ ।
0 comments:
Post a Comment